اعلم الناس درس جمالك

من گد ما جمالك شاغل الناس
ضافته الوزارة اعله اليدرسون
ومن گد ما صعب محد نجح بيك
النجح بشفايفك راسب بالعيون
ومن دون المناهج ترك ما بيك
اذا اترك فراغ يعني انه مجنون
وصدگني اليوصفك چذب اعليك
لان انته الوحيد الما الك لون
تعال وشوف لمن امتحن بيك
يوگف علي اكثر من مراقب
اغافلهم واحاول انقل اعليك
واجي بنص السنه وهم انه راسب
علم شفايفك مو بس كتابين
انجمع بيهن علم كل المكاتب
وبچفوفي من الزمك الزم اخيال
بس الگه الشهد بچفوفي ذايب
من تمشي على كيفك گوة تنشاف
وغشاوة تصير بعيون المراقب
يجي الاستاذ يسأل عل اليغيبون
يگله استاذ بس الحلو غايب
واجي انه اخر السنه وجابولي تعريف
وگالوا بالسؤال تعرف افلان
اگلهم رمشه عود وجفنه زرياب
اذا يطبگ جفونه يطلّع الحان
وصوتك ينزرع بين التصاوير
وتضل الصورة تحچي بهيئة انسان
و وجناتك جهنم بيها تعذيب
لكن تختلف ما بيها دخان
وخصرك ينحسب بالسنتيمترات
واذا يطلع غلط تختل الاوزان
وطولك بيه خلگ كل الفلاليح
اذا بحّرنه بيه انشوف بستان
وبعد كل هذا الوصف گلت اطلع اكمال
طلعت ماخذ صفر وحسابي غلطان
ونعم اعترف ما جاوبت بيك
ولو يطلع نيوتن يبقى حيران